ازل سے ابد تک کا سفر اور میں

کوئی سال پہلے میں چھٹیوں میں گاؤں تھا، ڈیرے پر ہم چند ایک لوگ بیٹھے تھے، گاؤں کے ایک بزرگ"میرزادے" یعنی میراثی(بطور تضحیک نہیں لکھ رہا)تشریف لائے ۔ بعد از سلام دعا، میں نے عرض کیا ، چا چا جی، شجرہ تو سنا دیں ایک دفعہ ہمارا۔ بزرگوں نے حقے کی نے سے لمبا کش لگایا اور دھویں کا مرغولہ بطرف آسمان چھوڑ کر گویا ہوئے ۔ فلک شیر چیمہ ولد فیاض الرحمان چیمہ ولد احسان اللہ چیمہ ولد سردار احمد چیمہ ولد فیض اللہ چیمہ ولد سردار جگت سنگھ چیمہ ولد سردار دلجیت سنگھ چیمہ ۔۔۔۔اور اس کے بعد اک لمبی فہرست پرکھوں کی ۔۔

 آج میں بیٹھا سوچ رہا تھا، کہ کن کن زمینوں سے ہم اگتے ہیں اور کن پشتوں میں چھپے رہتے ہیں ہزاروں سال ۔۔۔عقائد کی ایک فہرست ہے، بلاواسطہ یا بالواسطہ جن سے ہم متعلق رہے ہیں۔۔۔کن کن رنگوں میں ۔۔۔۔کہاں کہاں کی ہواؤں میں ۔۔۔کہاں کہاں کی بہاروں خزاؤں میں میرا حصہ آج بھی ہے اور کب تک رہے گا ۔۔۔ایسے لگتا ہے ، اربوں حصے ہیں میرے ازل سے ابد تک ۔۔۔۔یا شاید اتنے کہ ان کا شمار ممکن ہی نہیں کون ہے، جو اُن سب زمانوں،زمینوں، پانیوں،خشکیوں، فضاؤں،بہاروں،
خزاؤں،خوابوں،حقیقتوں اور سرابوں میں میرے ساتھ رہاے اور رہے گا ـــبس ــــــایکـــــــایک ہی ــــمیرا خالق